વ્હાલપની વાતે વિદુષી વિનોદી હશે, મેઘાવી વ્હાલમનીયે મનોહારી હશે!

“પિયુની ઘણી પ્યારી હશે”                                      

જન્મોજન્મના ઋણાનુબંધ કોઈ હશે,
તેથી તારીને મારી સાચી યારી હશે.

સુંદર સ્નેહભરી પ્રીતી નિરાળી હશે,
નિર્મળ પ્રેમે સંગની વૃત્તિ સુહાની હશે.

વ્હાલપની વાતે વિદુષી વિનોદી હશે,
મેઘાવી વ્હાલમનીયે મનોહારી હશે.

સહવાસે વીતતી હરપળ પ્યારી હશે,
સાથે ઢળતી સાંજ બધીજ ન્યારી હશે.

ઉત્કટ પ્રેમમાં, સ્પર્શની ભાષા જારી હશે.
મોંઘી પળો મિલનની ઘણી પ્યારી હશે.

બંને હૈયે હામ ને આંખોમાં ખુમારી હશે,
ચારેય નેનોમાં, શમણાંની સવારી હશે.

પ્રત્યેક મિલનમાં દૂરીની પળો ભારી હશે.
હંમેશા સાથ નિભાવાની હામીદારી હશે.

ફરજો માંહીયે આપણી ભાગીદારી હશે.
વ્હાલા પિયુને, પિયુની ઘણી પ્યારી હશે!

પારૂ કૃષ્ણકાંત “પિયુની”