“જીવન”…… ક્યારેક વળી મને લાગતું એવું, નિરુદ્દેશ્ય સંચરવું જીવન એવું !

   “જીવન”jiwan 5

ક્યારેક વળી મને લાગતું એવું,

નિરુદ્દેશ્ય સંચરવું જીવન એવું !

ક્યારેક વળી મને આશ્ચર્ય એવું,

સુખમય ધન્ય જીવન આવું !

ક્યારેક વળી પરિક્ષણ એવું,

પ્રતિકૂળ સમયે શીખવ્યું કેવું !

ક્યારેક વળી મને વિસ્મય જેવું,

પ્રબળ મનોબળ મારું કેવું !

ક્યારેક વળી અન્વીક્ષા જેવું,

અહી આ જગમાં મુજનું હોવું !

ક્યારેક વળી પરમ સ્વીકાર જેવું,

કોઈ કલ્યાણ ઉદ્દેશે મારું હોવું !

ક્યારેક વળી પજવતું પ્રશ્ન જેવું ,

અસ્પષ્ટ અલૌકિક આભાસે એવું !

ક્યારેક વળી સ્પષ્ટતા ગોતતું ,

કંઈક સૌમ્ય પરમ પ્રકાશે ધીમું !

પારૂ કૃષ્ણકાંત “પિયુની”

Posted in મારા સ્વરચિત કાવ્યો | Tagged , , , , , , | 2 ટિપ્પણીઓ

જાણે અજાણ્યે સમય જાણે એકાદ દાયકો પાછળ ખસી ગયો હતો …. બેઠક રૂમ જાણે ક્લાસ રૂમ બની રહ્યો !…..

 

“હમ હોંગે કામિયાબ એક દિન….”

 

વર્ષો પછી એક વાર સ્કુલના બધાય મિત્રો ભેગા મળ્યા. બધાય પોત પોતાના જીવનમાં અને કાર્ય ક્ષેત્રોમાં ખુબ સફળતા પૂર્વક ગોઠવાઈ ગયા હતા. તેઓએ પોતાના જીવનની અને પોતાની સફળતાઓની વાતો વારાફરતી કરી . ધીરે ધીરે વર્ષોનું અંતર ઘટતું ગયું અને સાથે વિતાવેલા સમયની યાદો તાજી થતી ગયી . સાથે વિતાવેલા બાળપણના અમુલ્ય વર્ષો કેવી કેવી યાદો મૂકી જાય છે …… શાળાના વર્ગો, નાના મોટા તોફાન, મસ્તી, શિક્ષકો …તેમના પાળેલા ઉપનામો, વર્ગ છોડીને ભાગવાની મજા અને પછી પકડાઈ જવાની સજા, વધુ ગૃહકાર્યના મળે તે હેતુથી શિક્ષકો સાથે કરતા તે ચાલાકીઓ અને બીજું બધું કેટલુય.
આ બધા વચ્ચે તેમને યાદ આવી ગયા તેઓના એક અતિ પ્રિય શિક્ષિકા. હા તે એકજ તો હતા જેઓ બાળકોને ખુબ સારી રીતે સમજતા …. હા તેઓ એકજ તો હતા જેનાથી બાળકોને ક્યારેય ડર નહોતો લાગ્યો પરંતુ ક્યારેય તેઓએ આપેલું વર્ગકાર્ય હોય કે ગૃહકાર્ય ક્યારેય અધૂરું નહોતું રહેતું. ક્યારેક વાળી બાળકો ન ભણવાની જીદ લઇ બેસે તો કહેતા … સાચી વાત એ વળી શું રોજ રોજ ભણવાનું ! ચાલો છોડો … આજે તો મને પણ વાતો કરવાનુંજ મન છે! ….. અને પછી એવી એવી વાતો કહેતા …કે બાળકોને ખ્યાલ પણ ન રહેતો કે વર્ગ પૂરો થઈ ગયો ….. એ વાતો પણ એવી રહેતી કે ક્યારેક એમાંથીજ અડધો પડધો પાઠ શીખાય ગયો હોય કે વળી કંઈ એવું નવીન હોય કે તેમાં જીવનભરની શીખ હોય. એમની વાતો અને વર્તન થકી તેઓનો દરેક વિદ્યાર્થી સાથે એક અનોખો નિકટનો લાગણી સંબંધ રચાયેલો .

આવા ટીચરની યાદ તાજી થતાંજ બે મિનીટનું મૌન છવાઈ ગયું …. જાણે એ બે મિનીટ દરેક પોતાની યાદો થકી લાગણીનાં સાગરમાં નાહી રહ્યા. બધાયે નક્કી કર્યું ચાલો તેમને મળીયે. એ શિક્ષિકા તો વર્ષો પહેલા જ શાળા છોડી ચુક્યા હતા. તેથી આખુંય ટોળું પહોચ્યું એમને ઘેર. ડોરબેલ વગાડતા પહેલા વિચાર આવ્યો કે જોઈએ તો ખરા તેઓ આપણને ઓળખી શકે છે કે નહિ? આપણાં માટે તો તેઓ એક હતા … પરંતુ તેમને માટે તો હજાર વિદ્યાર્થીઓ હતા …. તેઓ સર્વેનાં આશ્ચર્ય વચ્ચે જયારે બારણું ખુલ્યું તો જોયું કે તેઓના પ્રિય ‘મેમ’ હજીય પણ કંઈ ખાસ બદલાયા નથી … એજ દેખાવ, એવીજ ભાવવાહી આંખો, એજ સુંદર હાસ્ય અને એજ મીઠો આવકાર ….. બધાંયને અંદર દિવાન ખંડમાં બેસાડી અને પોતે પણ બેઠા …. દરેકના ચહેરા ઉપર આનંદ ઝળકતો હતો અને હોઠ પર હાસ્ય ….. શબ્દો તો જાણે લાગણીઓ વચ્ચે ક્યાંક અટવાઈ ગયા હતા. થોડી વારે શિક્ષિકાબેને હળવેથી પોતાની આંખો લુછી, અને ગળું સાફ કર્યું અને પછી ધીરે ધીરે દરેક યુવાનોને તેમના નામે બોલાવ્યા , અમુકને તો વળી નામ સાથે અટક પણ જોડી તો કોઈને વળી તેની કોઈ ખાસ આદત યાદ કરાવી, તો કોઈને તેના અતિ સુંદર અક્ષર …… દરેક વિદ્યાર્થી માટે તેમની પાસે કોઈ મીઠી યાદ સાચવેલી જ હતી!

બસ પછીતો… વાતોનો દોર ચાલ્યો અને દરેક જણ પોતે શું કરે છે … તેમની સફળતાઓ, તેમના સ્વપ્નો, તેમની ચિંતાઓ વિગેરે કહેવા માંડ્યું. આ બધી વાતોમાં એક વાત વારંવાર સામે આવી કે દરેક જણ પોતાના કામ, જીવન અને સંબંધો વચ્ચે ખુબ તણાવ અનુભવતા હતા. મહેમાન વિદ્યાર્થીઓ માટે તેમના ‘મેમ’ અંદર કોફી લેવા ગયા.

જયારે તેઓ બહાર આવ્યા ત્યારે તેમના હાથમાં એક મોટી ટ્રે હતી, જેમાં કોફીના મગ, બિસ્કીટની એક મોટી પ્લેટ અને સાથે એક પથ્થરો ભરેલી કાચની બરણી પણ હતી!!!……..

તેમણે હળવેથી ટ્રે વચ્ચે ટીપોય ઉપર રાખી, અને મીઠું મલકાતા હળવેથી પોતાની જગાએ જઈને બેઠા. અને …. સરસ મજાની કોફીની ચુસ્કીઓ લેતા… લેતા ધીરે…. ધીરે દરેક યુવાનોનો ચહેરા ઉપર એજ મલકાટ વિસ્તરી રહ્યો જૂની યાદ જે તાજી થઇ રહી હતી….!!!

“મેમ … આ …. તમે હજી પણ સાચવી રાખ્યું છે ?” એક યુવાને ના રહેવાવાથી પૂછી જ લીધું .

“અરે આ તો અમે જ્યારે Ninth માંથી 10th board માં (દસમાં ધોરણમાં) જવાના હતા, ત્યારે”…… બીજો યુવાન બોલી ઉઠ્યો .

“ના યાર તે પહેલા પણ …. આપને જયારે જયારે બહુ work છે ની complain કરતા ત્યારે…… ત્યારે”…..ત્રીજો યુવાન

“અરે આ વાત કેમ કરી ને ભૂલાય … આતો આપણી regular exercise બની ગયી હતી”… ચોથો યુવાન.

“અરે આ તો સ્ટીફન કવે    (Stephen R. Covey)   Put First Things First Spend time doing what fits into your personal mission,  Identify the key roles that you take on in life, and make time for each of them.” પાંચમો યુવાન.

“તો પછી હવે કેમ ભૂલી ગયા?” મેમ બોલ્યા .

“કોઈ પણ વ્યક્તિનો સમય બદલાય … સંજોગો બદલાય … કામ બદલાય … જવાબદારીઓ બદલાય .. પરંતુ તેનું તેના કામ પ્રત્યેનું મનોવલણ તો એજ રહેવું જોઈએ જે તેને દરેક કામમાં સફળતા આપે ..અને આત્મસંતોષ આપે બરોબરને?” આજે તમારા સર્વેની વાતોમાંથી એકજ સુર નીકળ્યો છે … ખુબ બધી જવાબદારીઓ છે….. સપનાઓ અપરંપાર છે …… આશાઓ અનેક છે … પરંતુ બધે કેમ કરીને પહોંચી વળવું તે મોટો પ્રશ્ન છે … હવેતો વળી સાથે કુટુંબની પણ જવાબદારીઓ છે, કેમ બરોબરને?” મેમે પૂછ્યું .

બધાય યુવાનો એકધ્યાનથી તેમના પ્રિય મેમને સાંભળી રહ્યા …… જાણે અજાણ્યે સમય જાણે એકાદ દાયકો પાછળ ખસી ગયો હતો …. બેઠક રૂમ જાણે ક્લાસ રૂમ બની રહ્યો !….. મેમની નજર અને હાથનો ઈશારો સમજી અને એક યુવાન તરતજ ઉભો થઈ અને મેજ પાસે જઈ અને ગોઠણભેર બેસી ગયો, અને હળવેથી તેને કાચની બરણી ખોલી અને આરસના લીસ્સા નાના મોટા એવા બધાય પથરાઓ બહાર કાઢ્યા, પછી ખાલી બરણી … જાર હાથમાં લઇ અને ઉપાડ્યો … તો બે ત્રણ યુવાનો એક સાથે … બોલી ઉઠ્યા … આ અમારો સમય અને લાઈફ …

પછી તે મેમ સામે જોઈ અને સૌથી મોટો પથ્થર હાથમાં લઇ અને બોલ્યો …. આ મારું ફેમીલી અને તે અંગેની જવાબદારી! અને તેને બરણીમાં ગોઠવ્યો , પછી બીજો મોટો પથ્થર ઉપાડી અને કહે આ મારી હેલ્થ, અને ફરી હળવેથી તેને બરણીમાં મુક્યો . પછી ત્રીજો મોટો પથ્થર … આ મારો નવો પ્રોજેક્ટ અને તેને પણ બરણીમાં મુક્યો . ચોથો મોટો પથ્થર …આ મારો બીઝનેસ ..અને તેને પણ હળવેથી ગોઠવી દીધો …પાંચમો …છઠ્ઠો સાતમો… આ મારો પર્સનલ ગ્રોથ ……. ત્યાર પછી ફાઈનાન્સ , સોશીયલ જવાબદારી , ફ્યુચર પ્લાનિંગ , સપનાઓ , શોખ , વિગેરે આવતું ગયું પથરાઓ નાના થતા ગયા અને અને લાઈફના સમયરૂપી જારમાં સમાતું ગયું …!!!!
આ એકસરસાઈઝ પૂરી થતાંજ ….હાજર દરેકના ચહેરાઓ આનંદ અને સંતોષથી ચમકી ઉઠ્યા! અને ત્યાંજ તેમના પ્રિય મેમનો હળવો મધુર અવાજ રેલાયી રહ્યો ….

“હોંગે કામિયાબ…… હમ હોંગે કામિયાબ ….. હમ હોંગે કામિયાબ એક દિન ….. ઓ..હો મન મેં હે વિશ્વાસ …પુરા હે વિશ્વાસ …. હમ હોંગે કામિયાબ એક દિન …..”

અને બધાંય તેમાં સાથ પુરાવી રહ્યા ….!

શિક્ષિકા મેમની આંખો તો ઝીલમીલ ઝીલમીલ … આજે તેમનો પ્રેમ, લગન …. તેમની મહેનત … નવું નવું શીખી અને બાળકો સાથે તેમના સ્તરે રહી અને વહેચવાની આદત  ….દરેક ચીજ …..વર્ષોની તપશ્ચર્યા આજે તો રંગ દેખાડી ગયી હતીને  …!

પારૂ કૃષ્ણકાંત “પીયુની”

Posted in મને ગમતું .... | Tagged , , , , , | Leave a comment

“કંઈક નવું વિચારો…..!” માંડુ એક વાર્તા

“કંઈક નવું વિચારો…..!” માંડુ એક વાર્તા……

ઘણા ઘણા વર્ષો પહેલાની વાત છે , કોઈ એક નાના ગામમાં એક ગરીબ ખેડૂત રહેતો હતો . તેનો નાનકડો પરિવાર હતો જેમાં તે પોતે , એની પત્ની અને એક સુંદર દીકરી હતી . એ ખેડૂત પાસે જમીનનો એક નાનો ટુકડો હતો , પરંતુ એના દુર્ભાગ્યે તે બહુજ ખડકાળ અને સુકો હોવાથી કઈ ખાસ ઉપજ આપતો નહતો. છતાંયે ખેડું ખુબજ મહેનતુ હોય તે જમીનમાંથી થોડી ઘણી ઉપજ મેળવી લેતો અને પોતાનું નાનકડું કુટુંબ નભાવ્યે રાખતો. પરંતુ કહેવાય છે ને કે ગરીબના નસીબ પણ ગરીબ હોય છે ….. એક વર્ષે જરાયે વરસાદ થયો નહિ, અને સાવ દુકાળ પડ્યો, ગરીબ ખેડુના તો કપરા દિવસો આવ્યા, ઘરમાં દાણો ખૂટ્યો અને ખિસ્સામાં પૈસો ખૂટ્યો! ગુજરાન ચલાવવા માટે ઉધાર ઉછીના કરવાના દીવસો આવ્યા. તે ગામમાં એક ઘરડો અને કદરૂપો શેઠીઓ રહેતો હતો જે બહુજ કપટી, લુચ્ચો અને દુરાચારી હતો . તે શેઠીઓ પૈસા વ્યાજે ધીરવાનો ધંધો કરતો હતો. આ શેઠીઓ લાચાર અને ગરજાઉ લોકો પાસે રૂપિયા વ્યાજે આપી અને ઘર અને જમીન પડાવી લેતો. ગરીબ ખેડુએ પણ તેની પાસે જમીન ગીરવે મૂકી અને રૂપિયા વ્યાજે લીધા , તેના મનમાં આશા હતી કે આવતું વર્ષ સારું જશે તો ખુબ મહેનત મજુરી કરીને પણ પોતાની જમીન છોડાવી લેશે. પણ બીજે વર્ષે પણ વરસાદ નબળો રહ્યો અને વાળી પાછુ ઘર ગીરવે મુકી અને ખેડુએ વધુ રૂપિયા ઉધાર લેવા પડ્યા આમ ને આમ બીજા થોડા વર્ષો નીકળી ગયા અને વ્યાજની રકમ મુદલ કરતા પણ વધતી ગયી અને પેલા કપટી અને લુચ્ચા શેઠના તકાજા પણ વધતા ચાલ્યા.

સમયની સાથે ખેડુની દીકરી પણ મોટી થઇ હતી, કુદરતે રૂપિયા તો નહોતા આપ્યા, પણ દીકરીને રૂપ ખોબલે ખોબલે ભરીને આપ્યું હતું ! પેલા black-and-white stonesદુરાચારી શેઠની નજરમાં ગરીબ ખેડુંની દીકરી વસી ગઈ હતી. આથી તેણે એક યોજના ઘડી કાઢી. ગામમાં જયારે પંચાયત બેઠી ત્યારે પેલા કપટી શેઠિયાએ પંચાયત સામે ખેડું અને એની દીકરીને બોલાવ્યા અને પોતાની વાત રજુ કરી. જો ખેડું પોતાની સુંદર નવયુવાન દીકરીને જો શેઠિયા સાથે પરણાવે તો શેઠિયો તેનું બધુજ દેવું માફ કરે અને ઘર અને જમીન પણ ખેડુંને પાછા આપે. આ વાત સાંભળીને ખેડું અને તેની દીકરી તો આઘાત પામી ગયા. તો પંચાયતમાં હાજર રહેલા ગામલોકોમાં પણ રોષ વ્યાપી ગયો. ક્યાં પેલી અતિસુંદર નવયુવાન દીકરી અને ક્યાં પેલો ઘરડો, કદરૂપો અને કપટી શેઠિયો ! લોકોમાં વ્યાપેલો રોષ અને વિરોધના સુરનો અણસાર આવતા પેલા લુચ્ચા શેઠીયાએ પોતાની વાત ફેરવી અને પોતાની સારપ દેખાડવા એક યોજના ઘડી કાઢી તેના હાથમાં એક થેલી હતી તે તેણે લોકો ને બતાવતા કહ્યું કે તે આ થેલીમાં બે પથ્થર મુકશે , એક કાળો અને એક સફેદ , પેલી યુવતી એ થેલીમાંથી એક પથ્થર કાઢવાનો રહેશે , જો એ કાળો પથ્થર હશે તો તેણે શેઠિયા સાથે લગ્ન કરવા પડશે અને શેઠીઓ તેના ગરીબ બાપનું બધુજ દેવુ માફ કરશે અને ઘર અને જમીન પણ પાછા આપશે અને જો એ સફેદ પથ્થર કાઢશે તો તેને શેઠિયા સાથે લગ્ન નહિ કરવા પડે અને તોય શેઠીયો તેના બાપનું બધું દેવું માફ કરીને ઘર અને જમીન પાછા આપી દેશે , પણ જો એ યુવતી આમ કરવાની નાં પાડશે તો એ તેના બાપને જેલમાં પુરાવશે ! આમ વાત કરતા કરતા તે શેઠિયાએ નીચે નમી અને ઝડપથી બે કળા પથ્થર ઉપાડી અને થેલીમાં નાખી દીધા   .   તેજ નજર વાળી યુવતીએ તે જોઈ લીધું . પ્રશ્ન હવે ઉભો થાય છે   …….. જો તમે એ યુવતી ની જગ્યા હો તો શું કરો? જો તમારે એ યુવતીના હિતેચ્છુ તરીકે એને સલાહ આપવાની હોય તો તમે શું કરવાનું કહો?   ખુબ વિચારતા ત્રણ શક્યતાઓ સંભવિત થતી લાગે છે,

 

  • એ યુવતી થેલીમાંથી પથ્થર કાઢવાની ના કહી દે ?

  • શું એ યુવતી થેલી માં બંને કળા પત્થર છે તે લોકોને બતાવી ને કપટી શેઠીયાની લુચ્ચાઈ ઉઘાડી પાડી દે?

  • શું એ યુવતી મૂંગી રહીને ચુપચાપ કાળો પથ્થર કાઢીને પોતાના બાપને કરજ અને જેલથી બચાવવા માટે પોતાની જિંદગીની કુરબાની આપી દે?

આ પરિસ્થિતિ તર્કસંગત યોગ્ય વિચારસરણી ધરાવનાર , અને અતાર્કિક દેખાતી પદ્ધતિથી સવાલનો ઉકેલ કરવાની વિચારસરણી ધરાવનાર વચ્ચેનો ફર્ક સમજાવી જાય છે…….

તે યુવતીએ થેલીમાં હાથ નાખી અને એક પથ્થર કાઢ્યો અને તેને જોયા પહેલાજ તેને તેને નીચે પડી દીધો તેથી તે નીચે પાથરેલા બીજા પથ્થરાઓ વચ્ચે મળી ગયો ! ….. અને તે બોલી …… “અરે અરે … હે ભગવાન હું પણ કેવી ગરબડીયણ છું .. પણ કઈ વાંધો નહિ તમે થેલીમાં જે બીજો પથરો છે તે કાઢી અને જુવો , એટલે મેં કયો કાઢ્યો હતો તે ખબર પડી જશે !!!!!

હવે થેલીમાંથી કાળો પથરો નીકળે એટલે નક્કી થઇ જાય કે તેણે સફેદ પથરો કાઢ્યો હતો . શેઠીઓ પોતાનું કપટ તો કોઈને કહી શકે નહિ તેથી શરત અનુસાર ગરીબ ખેડું ને બધું દેવું માફ કરી અને ઘર અને જમીન પણ પાછા આપવા પડ્યા .

આમ પેલી સમજદાર યુવતીએ મુશ્કેલ અને અશક્ય લગતી પરિસ્થિતિમાં પણ ખુબ સમજદારી અને હોશીયારી પૂર્વક વિચારીને પોતાને લાભકર્તા માર્ગ કરી લીધો !

પારૂ ક્રિષ્ણકાંત “પિયુની”

ક્યાંક સાંભળેલું મારા શબ્દો અને મારી ભાષામાં નવા વાઘા પહેરાવીને …….!

Posted in પ્રેરણાત્મક વાર્તા..કથાઓ | Tagged , , , , , , , , | 3 ટિપ્પણીઓ

ભ્રષ્ટાચારના છપ્પા – પી.કે. દાવડા Funny Pictorial Presentation

ભ્રષ્ટાચારના છપ્પા

 

જોજો રે ભારતના હાલ, દેશમાં નેતા માલા માલ,

દેશના નેતા ચારો  ચરે, જાનવરો  છો  ભૂખે મરે,

સાચા નેતા ગયા મરી, બાકી  રહ્યા તે રહ્યા ચરી.

corruption1 

રક્ષા  કાજ ખરીદી થાય  તેમા  નેતા કટકી ખાય

સરહદ પર સૈનિકો મરે, દેશમા નેતા  ખિસ્સા ભરે,

કફનમાં કટકી લેવાય, એ દેશની શી હાલત થાય?

CORRUPTION2 

સ્પેક્ટ્રમ  વેંચે   બારોબાર,  રાજાનો  થયો  કારોબાર,

દેશના ખવાયા કેટલા કરોડ, દાવડા એનું ગણિત છોડ,

દેશના  કાયદા કેવી મજા, થાશે નહિં કોઈને  પણ  સજા.

 corruption elephant

રમે  ખેલાડી કોમન્વેલ્થ, નેતા ગણે  પોતાની  વેલ્થ,

વહેતી ગંગામા  ધોયા હાથ, સૌએ આપ્યો સૌને સાથ;

દાવડા આતે કેવી રમત? વિચારવાની તું છોડ મમત.

 corruption National-Drink

કૈરોન, મહેતાબે કરી શરૂઆત, ભ્રષ્ટ જનોની થઈગઈ નાત,

મુંદડા  ને  તેજાએ  મળી, લાંચ  રૂશ્વતની  શરૂઆત  કરી,

દાવડા મેનને  કરી  કમાલ, વગર જીપે  દઈ  દીધો માલ.

 poor-and-rich-2

સાકરના  ગોટાળા  થયા, કૈકના  મોઢાં  કાળા  થયા,

રાશન  શોપથી  શેર  બજાર, ગોટાળાની  લાગી હાર,

દાવડા  ટેક્ષનો  રૂપિયો  જાય, દસ પૈસાના કામો થાય.

 

-પી.કે. દાવડા

Posted in મલકાટ.... ફરી મમળાવિયે ..... | Tagged , | 1 ટીકા

કોમપ્યુટરના છપ્પા – funny pictorial presentation

 

કોમપ્યુટરના છપ્પા

 

કોમપ્યુટરની જૂઓ કમાલ, બંધ પડે તો થઈ જાય હાલ,

દિમાગથી  વિચારવું પડે, યાદ   શક્તિની  સીમા   નડે;

દાવડા જો  કોમપુ  ના હોય, સંપર્ક  રાખે ક્યાંથી  કોઈ?

 

હાર્ડ ડીસ્ક કોમપુમાં ખાસ, થાય કરપ્ટ તો ત્રાસમ ત્રાસ,

સંઘરે  ફોટા, સંઘરે  લેખ,  સંઘરે  કવિતા, ગીત અનેક,

દાવડા એના  નખરા  જોઈ, ફલેશ-પેન રાખે  સૌ કોઈ.

 computer

મેમરી  બાઈ તો  નાના ઘણા, તો  પણ એના  નખરા ઘણા,

જ્યારે પણ એ ઓવર્ફ્લો થાય, સ્ક્રીન આખું રંગીન થઈ જાય,

નખરાળી  જો  નાટક  કરે, દાવડા તો  શું  કોમપ્યુટર  કરે?.

 

કોમપુમાં  પ્રોસેસર  ખાસ, પ્રોસેસર  જો  આપે   ત્રાસ,

કોમપુ જો થઈ જાય ગરમ, વાપરનારના ગાત્ર નરમ;

પ્રોસેસરની  અનેક  જાત,  પ્રોસેસર  બહુ ઊંચી નાત.

 sick computer

ઊંદર આંગળી ચીંધે જ્યાં, કોમપુ ઝટ પહોંચી જાય ત્યાં,

શોધી  કાઢે  ઢગલામાં સોઈ, છે આના જેવું બીજું  કોઈ?

દાવડા કોમપુમાં માઉસ મહાન, જાણે ગણેશજીનું વહાન.

 

કી  બોર્ડથી થાય  કામ  ઘણા, કામોની  ના  રાખે મણા,

ડીલીટ કરો તો કચરો સાફ, બોલ્યું ચાલ્યું થઈ જાય માફ;

દાવડા  સારૂં ‘સેવ’ કરે,  વિશ્વમા   ઈજ્જત  સાથે   ફરે.

 mouse

કોમપુના દરવાજા ખુલા,  વાપરનારમા ખપે સમતુલા,

વાપરનારનું  ચંચળ  મન, બિન  વસ્ત્રોના આવે  તન;

દાવડા કોમપ્યુટર વરદાન, જેવું  માનસ  એવું  દાન.

 

દાવડાએ  નિવૃતિ લીધી, કોમપ્યુટરને સોંપી  દીધી,

કોમપ્યુટરથી મિત્રો મળ્યા, દાવડાના કંટાળા ટળ્યા,

દાવડા કોમપ્યુટર વરદાન, વાપરવામા રાખો ભાન.

 

-પી. કે. દાવડા

Posted in મલકાટ.... ફરી મમળાવિયે ..... | Tagged , | 1 ટીકા

ઈંટરનેટના છપ્પા Funny pictorial presentation – પી.કે.દાવડા

ઈંટરનેટના છપ્પા


ઈંટરનેટમાં  સગવડ  બૌ,  બ્લોગ  બનાવવા  ચાલ્યા  સૌ, 

બ્લોગોની  થઈ  ગઈ વણજાર, બ્લોગ  થૈ ગ્યા એક હજાર; 

દાવડા બ્લોગની એવી જાણ, ચાલ્યા તો હીરા નહિં તો પાણ.

internet funny

 બ્લોગ જગતની એવી વાત, લેખક  પોતે તંત્રી આપ,

દસ  જણાને  લીંક મોકલે, ત્યારે બે ત્રણ કોમેન્ટ મળે

દાવડા બ્લોગના કેવા હાલ, સારી હતી જેની ગઈકાલ.

facebook funny

 ઈંટરનેટની જૂઓ કમાલ, સૌ કોઈ જાણે સૌના હાલ,

એક બીજાના કરી વખાણ, સૌ ભરતા પોતાનું ભાણ

દાવડા  સૌની  સાથે  રહે, કોઈ  એનું ના વાંકું  કહે.

 

ફેસબુક  ને ગુગલ ગ્રુપ, જાણે મળતું સ્વાદિસ્ટ સુપ,

હાય હલોનો ત્યાંવ્યહવાર, વિના પૈસાનો  કારોબાર,

દાવડા  જેમ દારૂનું વસન, ફેસબુકનું  એવું  ટશન.

photo shop funny 

કોઈનું માથું કોઈનું ધડ, ફોટોશોપનું એવું ઘડતર,

કોઈની પણ બદનામી થાય, કોને જઈને કહેવા જાય?

દાવડા  ઈંટરનેટથી   દૂર  રહેવામા ફાયદા ભરપૂર.

 

દાવડા ગુગલની જુઓ કમાલ, ચપટી વગાડો હાજર માલ,

સૌના  જાંગીયા  ગંજીના રંગ,  ગુગલ  જાણે  તંતો  તંત,

 જીપીએસ પણ કમાલ જ કરે, બસ કહી દો તો પહોંચાડે ઘરે.

 

funny net                                બે ડોકટર બ્લોગોમાં ફરે, પ્રિસ્ક્રીપ્શન નહિં સાહિત્ય ભરે,                            

એક  ચલાવે હાસ્ય દરબાર,  બીજા ચલાવે ચંદ્ર પૂકાર,

ડોકટર જો સાહિત્ય કરે, તો દાવડા શું પ્રિસ્ક્રીપ્શન ભરે?

 

 

 બ્લોગર તારી  છે આ  મજા, કોણ ચોરને કોને સજા?

લખે કોણ ને કોનું નામ, રોટલા ખા ટપટપનું શું કામ?

    લખનારાને પ્રતિભાવ ચાર, કોપી કરનારને મળતા બાર.

 

scraching2

                      સારા લેખને પ્રતિભાવ ચાર, સુંદર મુખડું પ્રતિભાવ બાર,                  

લેખ  ચડે  કે  ફોટો ચડે?  દાવડા  બ્લોગનું  કહેવું  પડે,

વાંચનારાને   બેઉ ગમે, પણ કારણ શું એ  કહેજો  તમે.

 

 

                              ખંજવાળી  દે મારી પીઠ  તો હું ખંજવાળું તારી પીઠ,                          

                              બ્લોગોમાં છે આ વ્યહવાર, દાવડા દીઠો મેં વારંવાર,                          

     લેખ ગમે તે વાંધો નહિં, પ્રતિભાવ સારો આપવો સહી.

 

life without net

પગાર નથી એક પણ પાઈ, બની ગયો તોપણ સિપાઈ,

      કોઈ જો કોપી-પેસ્ટ જ કરે, તે આગળ જઈ ફરિયાદ કરે,     

દાવડા આવા  મિત્રો હોય, તો શત્રુ રાખી  કરે શું કોય?

 

દાવડા ગુગલ કરે કમાલ, ત્રણે ભુવનના જાણે હાલ,

આકાશ પાતાળ એક જ કરે, જે જોઈએ તે હાજર કરે,

ગુગલ વગરનો આ સંસાર, ઘી ગોળ વગરનો કંસાર.

 

-પી.કે.દાવડા

Posted in મલકાટ.... ફરી મમળાવિયે ..... | Tagged , , | Leave a comment

સંબંધોના છપ્પા – પી. કે. દાવડા

સંબંધોના છપ્પાfunny family

 

દાવડા”સામાજમાં ફેરફારો થયા, સંબંધ થૈ ગ્યા તદ્દ્ન નવા,

સ્ટેપ થઈ ગયા મા ને બાપ, અર્ધા ભાઈ બહેન આપો આપ,

રોજે  રોજ  સંબંધ  બદલાય, મૂળ  સંબંધમાં  લાગી  લાય.

 

કાકા  મામા અંકલ  થયા, મામી  માસી  આંટીમાં   ગયા,

કઝીન થઈ ગયા સૌ પિતરાઈ, ભલે રહી હોય કોઈ સગાઈ,

દાવડા  સંબંધોની  ચોખવટ, લાગે સૌને  ફાલતુ   ઝંઝટ .

 

દાવડા સંબંધનું બદલ્યું માપ, સંબંધ થાતાં આપો આપ,

અર્ધા  ભાઈ ને  અર્ધી બહેન, હવે  નથી એ મારો વહેમ,

બબ્બે મા ને બબ્બે બાપ, સ્ટેપ કહી દયો, થઈ ગઈ વાત.

 

સંબંધની  વ્યાખ્યા  બદલાઈ, નથી  જરૂરી કોઈ સગાઈ,funny divorce

સંબંધો  સગવડિયા  થયા, નફા  તોટાના  હિસાબે રહ્યા,

સંબંધોની ન રહી કોઈ જાત, નાત  જાતને  દીધી  માત.

 

ક્યાં ગઈ સાત જનમની વાત? સંબંધ બદલે રાતો રાત,

દાવડા સરકારી કાયદો ફરે, પાંચ  વર્ષનો  કરાર જે  કરે,

ઇન્કમ ટેક્ષમા  છૂટ અપાય, જેથી  થોડા સંબંધ સચવાય.

-પી. કે. દાવડા

Posted in મલકાટ.... ફરી મમળાવિયે ..... | Tagged , , , | Leave a comment

“જીવન” ક્યારેક વળી મને લાગતું એવું …….

               “જીવન”jiwan 5

ક્યારેક વળી મને લાગતું એવું,

નિરુદ્દેશ્ય સંચરવું જીવન એવું !

ક્યારેક વળી મને આશ્ચર્ય એવું,

સુખમય ધન્ય જીવન આવું !

ક્યારેક વળી પરિક્ષણ એવું,

પ્રતિકૂળ સમયે શીખવ્યું કેવું !

ક્યારેક વળી મને વિસ્મય જેવું,

પ્રબળ મનોબળ મારું કેવું !

ક્યારેક વળી અન્વીક્ષા જેવું,

અહી આ જગમાં મુજનું હોવું !

ક્યારેક વળી પરમ સ્વીકાર જેવું,

કોઈ કલ્યાણ ઉદ્દેશે મારું હોવું !

ક્યારેક વળી પજવતું પ્રશ્ન જેવું ,

અસ્પષ્ટ અલૌકિક આભાસે એવું !

ક્યારેક વળી સ્પષ્ટતા ગોતતું ,

કંઈક સૌમ્ય પરમ પ્રકાશે ધીમું !

પારૂ કૃષ્ણકાંત “પિયુની”

 

Posted in મારા સ્વરચિત કાવ્યો | Tagged , , , , , , , , , , , , , , , , , , | 2 ટિપ્પણીઓ

“મળવા જેવા માણસ” – 22 શ્રીમતિ પારૂ ક્રિષ્ણકાંત પંડ્યા . શ્રીમાન પી. કે. દાવડા સાહેબની કલમે મારો પરિચય

paru krishnakant 1

શ્રીમતિ પારૂ ક્રિષ્ણકાંત પંડ્યા

પારૂબહેનનો જન્મ ૧૯૬૮ માં અમદાવાદમાં સુખી, સંસ્કારી અને આદર્શવાદી અનાવિલ બ્રાહ્મણ કુટુંબમાં થયો હતો. પિતા નરેન્દ્ર્ભાઈની ટેલીફોન ખાતામાં નોકરી હતી. માતા જ્યોતિબહેન ઉપરાંત કુટુંબમાં નાની બહેન કાનનનો સમાવેશ થતો હતો. બન્ને દિકરીઓને શ્રેષ્ઠ શિક્ષણ મળે એ માટે માતા-પિતાએ શક્ય એ બધું જ કર્યું. પારૂબહેને અમદાવાદની શ્રેષ્ઠ ગણાતી “અમૃત જ્યોતિ” અંગ્રેજી મીડિયમની શાળામાં દાખલ થઈ વિદ્યાપ્રાપ્તિની શરૂઆત કરી. આ શાળા, એ વખતની સામાન્ય શાળાઓ કરતાં અલગ હતી. અહીં ભણતર ઉપરાંત બાળકની પ્રતિભા નિખારવા (Personality Development) ઉપર ખાસ લક્ષ આપવામાં આવતું. આ શાળામાં રહી, માત્ર ૧૨ વર્ષની વયે પારૂબહેને વિવિધ પ્રાર્થના અને શ્ર્લોકોની સાથેસાથે ઈશાવાસ્ય અને ભૃગુવલ્લી જેવા ઉપનિષદ કંઠસ્થ કર્યા હતા અને બીજી પ્રવૃત્તિઓ જેવીકે મેડિટેશન, યોગા, હોર્સ રાઈડિંગ , સ્કેટિંગ , ડાન્સિંગ, ડ્રામેટીક્સમાં પણ નિપૂર્ણતા મેળવી. ૯ મા ધોરણમાં ભારત નાટ્યમનો સાત વર્ષનો કોર્સ પૂર્ણ કરીને અમદાવાદના ટાગોરહોલ માં આરંગેત્રમ કર્યું. સાથે સાથે કરાટે શીખવાનું પણ ચાલુ કર્યું પણ તેમાં બહુ ફાવટ ન આવવાથી એક વર્ષ કરીને છોડી દીધું . પારૂબહેનને વાંચનનો ખુબજ શોખ હતો. એમણે સ્કૂલ લાઈબ્રેરીની અનેક બુક્સ વાંચી નાખી હતી, એટલું જ નહિં પણ ઘરે અને પડોશમાં આવતા તમામ ન્યુઝ પેપર અને મેગેઝીન પણ વાંચતા.૧૨ માં ધોરણમાં એમના પિતાની બદલી વડોદરા ખાતે થઈ. વડોદરામાં ૧૨માં ધોરણ સાયન્સનો અભ્યાસ પૂરો કરી વડોદરાની ફેકલ્ટી ઓફ હોમ સાયન્સમાં એડમીશન લીધું. અહીં એમણે ઈતર પ્રવૃતિમાં સ્વીમીંગ શીખી લીધું. કોલેજમાં એમણે ચાઇલ્ડ ડેવેલપમેન્ટમાં સ્પેશ્યલાઈઝેશન કર્યું અને ફાઈનલ વર્ષમાં યુનીવર્સીટીમાં પ્રથમ આવ્યા.

કોલેજના વર્ષો દરમ્યાન વિવિધ પ્રોજેક્ટ્સ , assignments અને પરીક્ષાઓમાં અતિ ઉજ્જ્વલ દેખાવને કારણે પ્રોફેસરો, HOD અને ડીન ઉપર એક આગવી છાપ છોડી. હજી ભણવાનું પુરૂં નહોતું થયું તે દરમ્યાન એક અનોખો બનાવ બન્યો. વડોદરાની મેડિકલ કોલેજમાંથી M.D.(Skin & VD) ડીગ્રી મેળવેલા ડો. ક્રિષ્ણકાંતને પારૂબહેન ગમી ગયા. ડોકટરનો અને પારૂબહેનના કુટુંબનો પારીવારિક સંબંધ તો હતો, તેથી વાત આગળ વધારવામાં બહુ અડચણ ન આવી. ભણવાનું ચાલુ હતું છતાંયે સગપણ અને લગ્ન થઈ ગયા. ગ્રેજ્યુએટ લેવલનું ભણવાનું તો પુરૂં થયું, પણ પ્રોફેસરો, ડીન વગેરેના અતિ આગ્રહ છતાં, પરિણીત જીવનની કેટલીક મર્યાદાઓને માન આપી, એમણે પોસ્ટ ગ્રેજ્યુએટ કોર્સમાં એડમીશન ન લીધું. ફેકલ્ટી તો પારૂબેનને વધુ અભ્યાસ માટે સ્કોલરશીપ આપી ઈંગ્લેંડ મોકલવા પણ તૈયાર હતી, પણ એમણે એ ઓફર નકારી દીધી.

લગ્નબાદ એમના સસરા અને એમના પતિના જોબ અલગ અલગ શહેરોમાં હોવાથી, શરુઆતના બે વર્ષ રાજકોટમાં પતિ-પત્નીએ Nuclear Family નું જીવન ગુજાર્યું. એ દરમ્યાન એમને રાજકોટની પ્રખ્યાત શાળા એમ.વી.ધુલેશિયા સ્કૂલમાં શિક્ષક તરીકેની નોકરીની સામે ચાલીને ઓફર આવી, જે એમણે સહર્ષ સ્વીકારી. એ સમયગાળા વિશે પારૂબહેન કહે છે, “નવું ઘર , નવી જવાબદારી , નવી જોબ, નવો ઉમંગ અને ઉત્સાહ, બધુંય સાથે નીભાવાનું મુશ્કેલ તો હતું પણ અમે બેજ હતા , હોમ મેનેજમેન્ટ અને ટાઈમ મેનેજમેન્ટના નવા નવા experiment થતા ગયા અને ધીરેધીરે ફાવી ગયું. સ્કૂલમાં પણ ખુબ મન લગાવીને કામ કરતી. અહી લાઈબ્રેરી ખુબ મોટી હતી તે ઉપરાંત કોઈ પણ બુક ઓર્ડર કરીને મંગાવાની છૂટ હતી. શીખેલું બધુજ અમલમાં મુકવાના પૂર્ણ પ્રયાસ સાથે નવા નવા સુજાવ અને પ્રવૃતિઓ આપતી રહેતી. અહી મારા વાંચનનો શોખ કામ લાગતો હતો recent advances in education અંગે ખુબ નવું નવું વાંચી અને અમલમાં મુકવાના પ્રયાસ કરતી રહેતી, અને તે બધું સ્કુલ મેનેજમેન્ટને યોગ્ય લાગતું અને તેથી યથા યોગ્ય બદલાવ થતા ગયા, અને ત્યાંપણ મારી એક સરસ ઈમેજ ઘડાતી ચાલી.”

ત્યારબાદ એમની દિકરી ૠજુતાનો જન્મ થયો અને એમના સસરાની નિવૃતિને લીધે Nuclear family નું Joint family માં પરિવર્તન થયું . તે અંગેની સર્વે જવાબદારીઓ તેઓએ હંમેશા ખુબજ મનથી લાગણી અને પ્રેમથી નીભાવી છે . આ સમય દરમ્યાન તેમના પતિ ડો ક્રિષ્ણકાંતને આગળ અભ્યાસ અર્થે લંડન જવાનું પણ ગોઠવાયું સંજોગોને વશ થઈ પારૂબહેને શાળામાંથી એક વર્ષ માટે છૂટ્ટી લીધી. એક વર્ષ પછી પાછી જોબ ચાલુ થઇ ગઈ, સ્કુલમાં પણ નવી નવી જવાબદારીઓ સોંપાતી ચાલી અને પ્રગતિ ચાલુ રહી, સ્કુલની પણ અને એમની પણ! સ્કુલનેમાટે જરૂરી એવા સેમિનાર્સ , ટ્રેનીંગ વર્કશોપ્સ, ડિસટન્ટ લર્નીંગ કોર્સ વિગેરે એમણે સફળતાપૂર્વક પુરા કર્યા. આ દરમ્યાન કોમપ્યુટર વાપરવાનું પણ શીખી લીધું.

સ્કુલની પ્રગતિ ખુબ ઝડપી હતી નવા કેમ્પસ અને નવા નવા સેક્શનસ બનતા જતા હતા અને નવી નવી જગ્યાએ પારૂબેન નું પોસ્ટીંગ થતું હતું. છેવટે ICSE બોર્ડની S N Kansagra સ્કુલમાં સ્થાયી જવાબદારી મળી . મોટી દીકરી ઋજુતા પછી નાનો દીકરો હેતવ હતો. બંને સંતાનો ICSE બોર્ડની ગુજરાતની બેસ્ટ S N Kansagra   સ્કુલમાં અતિ ઉત્તમ દેખરેખ હેઠળ ભણતા હતા.

સ્કુલમાં પારૂબેનનું કાર્ય ક્ષેત્ર વિસ્તરતું જતું હતું , ટીચિંગ , પ્લાનીંગ , ટીચર્સ ટ્રેનીગ , coordinating વગેરે વગેરે . સન 2005 માં સ્કુલ તરફતી તેઓનું સન્માન કરવામાં આવ્યું . હેમુ ગઢવી હોલ માં 2500 માણસો વચ્ચે ખુબજ યાદગાર ફંન્કસન કરવામાં આવ્યું તે તેમના જીવનનું અમુલ્ય સંભારણું બની રહ્યું. Principal ની પોસ્ટ માટે જરૂરી M Ed ની ડીગ્રી માટે તેનો 2 વર્ષ નો કોર્સ કરવા માટે તેમને સ્કુલ તરફથી સિંગાપોર મોકલવાનું નક્કી થયું. ખર્ચ બધો સ્કુલ ભોગવવાની હતી પરંતુ ઘર કુટુંબ અને સંતાનોની જવાબદારી ને કારણે તે શક્ય બન્યું નહિ. થોડા સમય બાદ શાળામાં children with special needs માટે નવું section ચાલુ થયું અને એમાં std 1 to 10 ના coordinator તરીકે જવાબદારી મળી, તે ખુબ મન લગાવીને છેલ્લે સુધી નિભાવી. ૧૯ વર્ષ સ્કુલમાં કામ કરી આખરે એમણે તંદુરસ્તી અને કુટુંબની જવાબદારીને લક્ષમાં લઈ રાજીનામું આપ્યું.

પારૂબહેનના માતા-પિતાએ પોતાની બે દિકરીઓને જે રીતે ઉછેરેલી અને જે જાતનું શિક્ષણ આપેલું, એનું જ અનુકરણ કરીને પારૂબહેને એમની દીકરી ઋજુતા અને દીકરા હેતવના સંસ્કારો અને શિક્ષણ ઉપર પુરતું લક્ષ આપ્યું. આજે દિકરી Dentist છે અને દીકરો ૧૨ માં ધોરણમાં અભ્યાસ કરે છે.

પતિની અને બાળકોની પ્રગતિ માટે એમણે હંમેશાં પોતાની કેરીઅરના કોરે મૂકી છે. ડો ક્રિષ્ણકાંત પંડ્યા ખુબજ એક્ટીવ academician અને સફળ ડોક્ટર છે. International કોન્ફરન્સમાં એમના પેપર present થાય છે. આજે એમનું કલીનીક ૧૫૦૦ sq.ft. ની જગ્યામાં, લેટેસ્ટ લેઝર મશીન્સ, ૧૨ વેલ ટ્રેઇન્ડ અને ક્વોલિફાઇડ સ્ટાફ સાથેનું આખા ગુજરાતના one of the best dermatology અને cosmetology માટેનું ક્લીનીક ગણાય છે.

આવી high pressure વાળી કારકીર્દીમાં પણ પારૂબેન એમના સાહિત્ય પ્રત્યેના પ્રેમથી અળગા રહી શક્યા નથી. એમના મોટા ભાગના લખાણનો વિષય, પછી એ લેખ હોય કે કવિતા, પ્રેમ રહ્યો છે. એમની કવિતાઓમાં એમનો પતિ પ્રત્યેનો પ્રેમ નજરે ચડ્યા વગર રહેતો નથી. એક્વાર તો મજાકમાં મેં એમના એક કાવ્યના પ્રતિભાવમાં લખેલું, “એક રાધા, એક મીરા અને એક પારૂ; ત્રણે કૃષ્ણના દિવાના.” અનેક બ્લોગ્સમાં એમની રચનાઓ પ્રગટ થઈ ચૂકી છે. એમના લખાણો “પિયુની” ઉપનામથી પ્રગટ થયા છે. એમના પોતાના બ્લોગનું નામ પણ એમણે “પિયુનીનો પમરાટ” રાખ્યું છે. કૌટુંબિક જવાબદારીને લઈ થોડા સમયથી એ બ્લોગ્સ શાંત છે.

પારૂબહેનને જાણવા માટે તમારે ‘પિયુની’ ની કવિતાઓનો આસ્વાદ લેવો પડશે . paru_2

પારૂબેનના પોતાના શબ્દોમાં તેમની કાવ્યમય ઓળખ નીચેની લીંક ઉપર ક્લીક કરીને વાંચી શકાય છે .                         “જીવન પિયુનીએ એવું જીવ્યું”                              

તેઓ પોતાની ફિલસુફી અને જીવન મુલ્યો વર્ણવતા કહે છે ,

कर्मणयेवाधिकारस्ते मा फलेषु कदाचन।
मा कर्मफलहेतुर्भूर्मा ते सङ्गोऽस्त्वकर्मणि।

“મનુષ્યનો તેના નિયત કર્તવ્ય અને કર્મ કરવાનો અધિકાર છે,  પરંતુ તે કર્મના ફળ ઉપર તેનો અધિકાર નથી, માટેજ તેણે   પોતાની જાતને કદી પણ તેના કર્મોના ફળનું કારણ માનવી નહિ. તેણે ફળ પ્રતિ આસક્તિ રાખ્યા વગર કર્મ કરતા રહેવું જોઈએ. આવા નિષ્કામ કર્મ મનુષ્યને નિ:સંદેહ મુક્તિના માર્ગ પ્રતિ દોરી જાય છે.”

“શ્રીમદ ભગવદ ગીતાના આ શ્લોકને સમજીને અમલમાં મુકવાની કોશિશ કરું છું. આત્મા ને પરમાત્મા સમજીને દરેક વર્ગના લોકો સાથે સદભાવ અને પ્રેમભર્યો વ્યહવાર રાખવાની કોશિશ કરું છું. સમાજના ગરીબ, દુ:ખી અને નિ:સહાય અને જરૂરીઆતમંદ લોકોને થાય તેટલી મદદ કરીને પોતાની જાતને પરમકૃપાળુ પરમાત્માનું વહાલું સંતાન સમજી અને નસીબદાર માનું છું.”

– પી. કે. દાવડા

Posted in “મળવા જેવા માણસ” P K Davda | Tagged , , , , , | Leave a comment

અહો! કેવું સુંદર રચાયું ચિત્ર જોને , નયનરમ્ય ક્ષિતિજે, આથમતી સંધ્યા જોને !

“સંધ્યાસલૂણી”

અહો! કેવું સુંદર રચાયું ચિત્ર જોને,
નયનરમ્ય ક્ષિતિજે, આથમતી સંધ્યા જોને!
રાખીને સાક્ષી, શીતલ સરિતા તટની,
રચે મિલન મધુરું ધરતી અને ગગન જોને!
મચાવતી ધમાચકડી ગગન ગોખે,
નિર્દોષ ગોપિકા સમ વાદળીઓ જોને.
જાણે ઉરાડી રંગભરી પિચકારીને,
ખોબે ભરી ગુલાલ જોને.
વળી મસ્તીખોર પ્રીતમ શો ભાનુ,
ભરી ચુંટી સંધ્યાની નાજુક કમરે,
કરતો ઠીઠોલી સલૂણી સંધ્યાની જોને!
મુગ્ધ નવયૌવના શી સંધ્યાના,
ગુલાબી ગાલ પર લજ્જાના ખંજન જોને,
નાન્હેરા ભાંડરડા સમા બંને,
ચુગલીખોર ચાંદ, સંગે શુક્રતારિકા જોને,
કરવાને ચુગલી પ્રકૃતીમાને,
હળવેથી દુર રહીને ઝાંખતા જોને!

પારૂ કૃષ્ણકાંત “પિયુની”

Posted in મારા સ્વરચિત કાવ્યો | Tagged , , , , , , , , , , , | 2 ટિપ્પણીઓ